ვიზიტის ფარგლებში, სოფლის განვითარების სააგენტოს დირექტორმა დავით წითლიძემ, დელეგაციის წევრებთან ერთად,   შეხვედრები გამართა ესპანეთის სოფლის მეურნეობის სამინისტროს სახელმწიფო აგროდაზღვევის სააგენტოს წარმომადგენლებთან, ასევე სოფლის მეურნეობის სხვადასხვა მიმართულებით მომუშავე კომპანიებთან და კოოპერატივებთან. 

დელეგაციის წევრები გაეცნენ სოფლის მეურნეობაში ინოვაციური და კლიმატგონივრული ტექნოლოგიების გამოყენების პრაქტიკას, წამყვანი კოოპერატივების და გაერთიანებების ფუნქციონირების გამოცდილებას.

ვიზიტის ფარგლებში შეხვედრა გაიმართა ესპანეთის სამეფოში საქართველოს საელჩოს საქმეთა დროებით რწმუნებულ  ნატო ჩიქოვანთან.

ესპანეთის სამეფოში სამუშაო ვიზიტი გაეროს განვითარების პროგრამის „პროფესიული განათლების სისტემების მოდერნიზება საქართველოს სოფლის მეურნეობაში“ პროექტის ორგანიზებით განხორციელდა. აღნიშნული პროექტის მიზანია სასოფლო-სამეურნეო საექსტენციო  მომსახურების ხარისხის გაუმჯობესების ხელშეწყობა, რაც გულისხმობს ინოვაციური და კლიმატგონივრული ტექნოლოგიების შესახებ ინფორმაციაზე ხელმისაწვდომის ზრდას  და ციფრული ექსტენციის სერვისების დანერგვას.